كمان سؤال لدكتورنا محمد شقير
ما بتقدر تعمل اي شي بدون طبيب الاسنان
هلا اصفرار الاسنان الو اكتر من سبب و اكتر من نوع:
1- يمكن يكون ناتج عن صبغات موجودة في الاكل او الشرب متل القهوة. او صبغات ناتجة عن الدخان. و هاي الصبغات بتكون سطحية يا اما بتروح مع تنظيف الاسنان "تبع الدكتور مو التفريش" او باستخدام تبييض الاسنان "تبييض الاسنان البيتي او تبييض الاسنان بالليزر..... الخ"
2- يمكن يكون ناتج عن تآكل طبقة المينا " الطبقة الخارجية البيضاء و الشفافة من السن" و بتكون الطبقة اللي تحتها اللي اسمها العاج تكون مكشوفه او شبه مكشوفه. و طبقة العاج لونها اصفر اصلا. و هدا السن بحتاج تلبيس
3- ممكن يكون ناتج عن عيب في تكوين السن نتيجة التعرض للاشعاع او المرض او اخذ ادوية مضرة ببراعم الاسنان خلال فترة تكون السن. و من هذه الحالات عدم قدرة الخلايا المخصصة لتصنيع طبقة الميناء على اداء وظائفها فبطلع السن من دون ميناء و بكون بس عاج و هيك بكون اصفر. و برضو هدا السن بحتاج تلبيس
4- ممكن يكون الصفار ناتج عن تراكم طبقات البكتيريا "البلاك" على الاسنان و خاصة عند اللي ما بفرشو سنانهم. و هدا اللون بنتج عن تفاعلات البكتيريا مع بعض الاشياء التي تدخل عن طريق الفم مثل القهوة او الشاي. و الحل هنا هو ان تعمل تنظيف الاسنان" برضو تبع الدكتور" و اذا برضو ما راح اللون راح تحتاج تبييض.
ملاحظة: كترة استعمال تبييض الاسنان بتضر السن. عشان هيك لازم تراجع طبيب الاسنان و هو بقررلك اذا بتبيض اسنانك عن طريق التبييض البيتي اللي هو يعني استخدام جل معين تحطو على اسنانك طول الليل باستخدام اداة خاصة و اللي ما بتقدر تحصل عليها الا من دكتور الاسنان. او عن طريق التبييض بالليزر و اللي ما بتم الا ببعض العيادات نظرا لغلاء سعره و هو اخف ضررا من تبييض الاسنان البيتي.
شكرا لك احمد على هذا السؤال و ان شاء الله تكون المعلومة وصلت
